Andam ang House prosecution panel sa pag-cross-examine kang Vice President Sara Duterte kung ipresentar siya sa iyang defense team isip saksi sa pagpadayon sa impeachment trial sa Senado sa Nobyembre 9, 2026.
Sumala ni House prosecution adviser ug spokesperson, kanhi Representative Robert Ace Barbers, dugay na silang nangandam sa pagsusi sa mga tubag ni Duterte kabahin sa mga alegasyon sa iyang pinansiyal nga transaksiyon, deklarasyon sa kabtangan ug interes sa negosyo.
Nahuman na sa prosecution ang pagpresentar sa ebidensiya ubos sa Article II. Lakip sa ilang mga dokumento ang SALN, income tax records, corporate filings ug bank records, nga gigamit ni forensic accounting expert Alexander Cabrera sa pagbanabana sa ₱817.87 milyon nga giingong dili mapatin-aw nga bahandi nga nalambigit kang Duterte ug sa iyang bana nga si Atty. Manases Carpio.
Gikuwestiyon usab ni Barbers ang giingong kalainan tali sa cash nga gideklara ni Duterte ug sa mga balanse sa iyang bank records.
Samtang, si human rights lawyer Dino de Leon, convenor sa Bantay Senado, miingon nga angay hatagan og igong higayon ang defense nga ipasabot ang mga rekord, bisan pa sa panawagan sa Bantay Senado nga konbiktahon si Duterte.
