Mipirma og kasabutan ang Department of Foreign Affairs ug Supreme Court kaniadtong Miyerkules, Oktubre 22, 2026 alang sa pagtukod og sentralisadong database sa mga balaod sa divorce sa ubang nasod, aron mapadali ug mapamenosan ang gasto sa pag-ila niini sa mga korte sa Pilipinas.
Sumala kang Foreign Affairs Secretary Ma. Theresa Lazaro, makatabang ang maong lakang sa mga Pilipinong nag-atubang og legal nga problema bahin sa ilang marital status.
Kabahin kini sa tripartite memorandum of agreement tali sa DFA, Supreme Court Committee on Family Courts and Juvenile Concerns ug Office of the Court Administrator.
Gisundan kini sa mga amendment sa Rules of Court nga giaprobahan sa Korte Suprema kaniadtong Oktubre 7. Ubos sa bag-ong mga lagda, dili na kinahanglan nga pamatud-an sa Filipino spouse ang langyaw nga balaod sa diborsyo sa pagsumiter sa petisyon; kinahanglan lamang nga mapamatud-an nga nahitabo ang maong diborsyo.
Pagpasabot usab sa korte nga nagpabilin ang obligasyon sa pagsumiter og petisyon alang sa judicial recognition. Ubos sa Article 26(2) sa Family Code, mahimong makaminyo pag-usab ang Filipino spouse kung ang balidong foreign divorce naghatag sa langyaw nga kapikas og legal nga katungod sa pagminyo pag-usab.
Samtang, lahi niini ang Senate Bill No. 2388 nga gisumiter ni Senate President Pro Tempore Vicente “Tito” Sotto III, nga nagtanyag og mas barato nga administratibong proseso sa pag-ila sa kwalipikadong foreign divorce decrees.
