Gilaumang mosaka ang pamasahe sa eroplano sugod sa Nobyembre human ipataas sa Civil Aeronautics Board o CAB ang fuel surcharge ngadto sa Level 17 alang sa Nobyembre 1 hangtod 15, 2026. Kini ang pinakataas nga lebel sukad sa Mayo.
Ubos niini, mahimong maningil ang mga airline og ₱559 hangtod ₱1,635 matag pasahero sa domestic flights, samtang ₱1,846.10 hangtod ₱13,726.58 sa international flights, depende sa gilay-on sa destinasyon. Ang maong bayranan dugang sa base fare ug gipahamtang matag flight segment o usa ka biyahe.
Mas taas kini kumpara sa Level 16 nga gipatuman gikan Oktubre 16 hangtod 31, diin ang surcharge sa domestic flights mokabat sa ₱525 hangtod ₱1,535, samtang ₱1,733.76 hangtod ₱12,891.29 sa international flights.
Base sa CAB advisory, misaka ngadto sa $196.70 kada bariles ang global jet fuel price kaniadtong Oktubre 23. Gitakda usab sa ahensiya ang exchange rate nga ₱63.01 matag dolyar alang sa fuel surcharge nga kolektahon sa langyawng kuwarta sa tunga-tunga sa Nobyembre.
Apan, dili awtomatikong ipatuman sa tanang airline ang pinakataas nga gitugot nga fare. Kinahanglan una silang mosang-at og aplikasyon sa CAB, ug ang surcharge nga ilang kolektahon dili molapas sa gitakdang lebel.
Ang fuel surcharge ibase sa lebel nga epektibo sa adlaw sa pagpalit sa ticket. Busa, ang mga pasaherong mopalit og tiket sa wala pa Nobyembre 1 mahimong maaplikaran sa Level 16, bisan pa og mas ulahi ang ilang biyahe, gawas kon adunay pagbag-o sa booking nga magkinahanglan og pag-adjust sa surcharge.
