Gipatin-aw ni Senador JV Ejercito nga dili siya kontra sa China isip nasud o sa katawhang Chinese, kondili supak siya sa giingong dili diplomatikong pahayag ni Chinese Ambassador Jing Quan nga, sumala sa senador, mahimong isipon nga hulga ug pagpanghadlok.
Matod ni Ejercito, nagdako siya sa pakig-uban sa komunidad sa mga Chinese ug naggamit usab og mga produkto nga gikan sa China.
Gibutyag niya nga ang iyang pagsupak nakasentro sa pahayag nga iyang giisip nga dili angay sa diplomatikong relasyon tali sa duha ka nasud.
Gihatagan usab og gibug-aton sa senador nga ang tinuod nga tinguha alang sa kalinaw kinahanglan ipakita pinaagi sa pagkasinsero, pagtahod ug maayong relasyon sa matag nasud.
Giawhag usab ni Ejercito ang mga Pilipino nga maghiusa sa pag-atubang sa mga sitwasyon nga iyang gihulagway nga pagpamugos ug pagpangdaog-daog, ilabi na kon nalambigit ang dignidad ug interes sa nasud.
Dugang pa sa senador, importante nga magpabiling lig-on ang panaghiusa sa katawhang Pilipino taliwala sa mga isyu nga naglambigit sa nasudnong interes.
Giangkon usab ni Ejercito nga natingala siya ug nagkaluya ang iyang paglaom tungod sa mga nagakahitabo sa nasud. Bisan pa niini, gikanayon niya nga magpadayon siya sa pagbarog alang sa kamatuoran ug sa mga butang nga iyang gituohang husto.
