Mikabat na sa 734 ang naitalang insidente sa sunog sa Davao City gikan Enero hangtod Septiyembre karong tuiga, mas taas og 38 porsiyento kumpara sa 532 ka insidente nga natala sa samang panahon niadtong 2025.
Sumala sa report sa Davao City Fire District – Bureau of Fire Protection (BFP), wala pa maapil sa maong ihap ang mga sunog nga nahitabo sa ninglabay nga mga adlaw, nga nagpakita sa pagtaas sa mga insidente sa sunog sa siyudad.
Matod ni Fire Senior Inspector Frances Marie Sendrijas, ang mga insidenteng may kalabotan sa elektrisidad maoy nag-unang kasagarang hinungdan sa sunog sa Davao City. Gisundan kini sa open burning o pagsunog sa basura ug mga uga nga sagbot, nga mahimong hinungdan sa pagkaylap sa kalayo ngadto sa mga kabalayan ug residential areas, ilabi na kon dili kini mabantayan o makontrolar.
Tungod niini, gipahinumdoman ang publiko nga magmatngon sa paggamit sa mga de-koryenteng kagamitan ug likayan ang walay pag-amping nga pagsunog sa basura ug uga nga mga sagbot aron malikayan ang dugang insidente sa sunog ug mapanalipdan ang kinabuhi ug kabtangan.
