Nagpahigayon sab og pagpanghatag og init nga pagkaon ang Office of the Vice President (OVP) ngadto sa mga bombero ug emergency responders nga nagtabang sa pagpalong sa sunog sa Barangay Bucana, Davao City, niadtong gabii sa Biyernes, Oktubre 16.
Pinaagi sa Kalusugan Food Truck, naghatag og pagkaon ang OVP sa mga personnel nga nagpadayon sa ilang operasyon aron mapalong ang kalayo ug matubag ang panginahanglan sa mga apektado sa insidente.
Giawhag usab sa buhatan ang publiko nga iapil sa pag-ampo ang kaluwasan sa mga responders ug sa mga pamilyang naapektuhan sa sunog.
Gipadayag usab sa OVP ang pagpasalamat sa mga bombero, volunteers ug uban pang mga indibidwal nga mitabang sa pagresponde sa emerhensiya.
Ang pagpanghatag sa pagkaon kabahin sa suporta sa mga nag-atiman sa operasyon sa pagpalong sa kalayo, samtang nagpadayon ang pagtabang sa mga apektadong residente sa maong barangay.
Nagpabiling importante ang koordinasyon sa mga emergency personnel ug boluntaryo sa pagtubag sa mga sunog, ilabina sa mga lugar nga daghan og kabalayan ug residente.
