Mokunhod sa ₱4 hangtod ₱4.20 kada litro ang presyo sa gasolina sa sunod nga semana, samtang posibleng mosaka og ₱0.20 hangtod ₱0.40 kada litro ang diesel sugod Oktubre 19, 2026.
Base kini sa inisyal nga pagtantiya sa mga source sa industriya sa lana, nga gibase sa unang upat ka adlaw nga average sa Mean of Platts Singapore o MOPS ug foreign exchange rates. Apan, posible pa kining mausab depende sa lihok sa merkado sa dili pa ipatuman ang opisyal nga presyo.
Sumala kang Bellas, presidente sa Jetti Petroleum, nakaapekto sa pag-ubos sa presyo sa gasolina ang pagluag sa kabalaka kabahin sa suplay sa Asia ug ang pagdaghan sa available nga gasolina human mobalik sa operasyon ang pipila ka refinery.
Samtang, nagpabiling ubos ang global diesel inventories, hinungdan nga gilaumang mosaka gamay ang presyo niini. Apan, nakatabang sa pagpugong sa mas dakong pagsaka ang posibilidad sa dugang nga suplay gikan sa Russia ug ang pagpagawas sa mga reserbang diesel sa mga nasod sa G7.
Nagpabilin usab ang kawalay kasigurohan kung makahatag ba og igo nga dugang suplay ang posibleng kasabutan tali sa Estados Unidos ug Russia bahin sa diesel.
Dugang sa pressure sa presyo sa lana ang mga pagkaputol sa shipping operations sa Strait of Hormuz ug ang padayong pag-atake sa Houthi rebels batok sa Saudi Arabia.
Apan, nakatabang sa pagpugong sa mas dakong pagsaka sa presyo ang pagdaghan sa oil shipments gikan sa Gulf region, produksiyon sa Russia ug pagpagawas sa emergency oil reserves. Posible usab nga moubos ang gasto sa transportasyon sa lana kung pahuyangon sa Estados Unidos ang mga restriksiyon sa mga barkong sakop sa sanctions.
