Miabot na sa 9,066 ang naitalang kaso sa Ebola outbreak sa Democratic Republic of Congo o DRC, samtang mikabat na sa 4,381 ang namatay, base sa estadistikang gipagawas sa gobyerno sa nasod niadtong Oktubre 13, 2026.
Gipahinabo ang kasamtangang outbreak sa talagsaong Bundibugyo variant sa Ebola virus, nga mikaylap na sa 65 ka health zones sa pito ka probinsya sa Congo. Gibanabana usab nga posibleng mas taas pa ang aktuwal nga ihap sa mga kaso tungod sa mga wala pa madetektar nga impeksiyon.
Usa sa mga nag-unang hinungdan sa kabalaka mao ang kawalay aprubadong espesipikong bakuna ug tambal batok sa maong variant. Ang mga bakuna ug tambal nga gidisenyo batok sa mas komon nga Zaire variant, lakip ang Ervebo, wala pa mapamatud-i nga epektibo batok sa Bundibugyo virus.
Base sa datos sa World Health Organization hangtod Oktubre 6, mikabat sa 48.2% ang case fatality rate sa outbreak. Nagpasabot kini nga halos katunga sa mga kumpirmadong kaso ang namatay, base sa kasamtangang datos.
Ang probinsya sa Ituri, ilabina sa mga lugar sama sa Mongbwalu, giila nga sentro sa outbreak. Gawas niini, mikaylap usab ang virus sa North Kivu, South Kivu, Bas-Uélé, Haut-Uélé, Sud-Ubangi ug Tshopo. Mas nahimong hagit ang pagkontrol sa sakit tungod sa armadong panagbangi, pagbalhin sa mga residente ug kalisod sa pag-abot sa mga health worker sa pipila ka komunidad alang sa contact tracing ug pagtambal.
Dugang sa Congo, nakatala usab og mga kaso ang silingang Uganda ug Kenya. Kaniadtong Oktubre 5, 2026, namatay sa Kenya ang unang kumpirmadong pasyente nga natakdan sa Bundibugyo virus human mibiyahe gikan sa Congo agi sa Uganda.Samtang niadtong Oktubre 14, gikumpirma usab sa Kenya ang ikaduhang kaso nga nalambigit sa unang pasyente. Sa miaging mga bulan, nakatala ang Uganda og 20 ka kumpirmadong kaso sa maong variant sa wala pa ideklarang kontrolado ang lokal nga transmission.
Aduna usab mga medical ug humanitarian workers nga natakdan samtang nagserbisyo sa Congo ug gipabalik sa ilang tagsa-tagsa ka nasod pinaagi sa medical evacuation ubos sa higpit nga isolation protocols.
Sa risk assessment sa WHO niadtong Agosto 14,2026 giklasipikar nga very high ang risgo sulod sa Congo, high sa mga kasikbit nga nasod sa Africa nga mahimong maapektuhan, ug low sa tibuok kalibutan. Bisan pa niini, nagpadayon ang pagsusi sa kahimtang tungod sa mga bag-ong kaso ug sa posibilidad sa dugang nga transmission.
Padayon ang mga eksperto ug health authorities sa surveillance, contact tracing, isolation ug pag-atiman sa mga pasyente, samtang nagpadayon usab ang panukiduki alang sa bakuna ug epektibong pagtambal batok sa Bundibugyo variant.
