Gipasiugda ni Pangulong Ferdinand Marcos Jr. nga dili madawat sa Pilipinas ug Poland ang bisan unsang pagsakop sa teritoryo o pagsulay sa pag-usab sa territorial boundaries sa usa ka nasod.
Atol sa iyang pakighinabi kang Polish President Karol Nawrocki sa Malacañang, gipasiugda ni Marcos ang hiniusang pagtahod sa international law ug malinawon nga pagsulbad sa mga panagbangi. Lakip sa ilang gihisgutan ang maritime security, cybersecurity ug proteksyon sa strategic supply chains.
Samtang, mipahayag si Nawrocki nga gusto sa Poland nga ipataas sa lebel sa strategic partnership ang relasyon niini sa Pilipinas, ilabina sa seguridad, depensa, teknolohiya ug uban pang importanteng sektor.
Sa legal cooperation, mipirma ang duha ka nasod sa Agreement on Mutual Legal Assistance in Criminal Matters, samtang gikumpirma ni Marcos nga andam na ang Pilipinas ug Poland nga sugdan ang negosasyon alang sa usa ka extradition agreement. Una nang mipirma ang duha ka nasod og kasabutan sa pagbalhin sa mga nahusay nga mga piniriso.
Dugang pa, gihatagan og importansya ni Nawrocki ang kooperasyon sa maritime security, civil ug military security, ingon man ang pag-atubang sa hybrid attacks sama sa disinformation ug sabotage. Matud niya, mahimong magtinabangay ang Pilipinas ug Poland pinaagi sa ilang tagsa-tagsa ka kasinatian sa pag-atubang sa mga hagit sa seguridad ug kalamidad.
Mas gipalapdan usab ang defense cooperation tali sa duha ka nasod, lakip ang pagkuha sa Pilipinas sa S-70 Black Hawk helicopters gikan sa Poland ug ang pagpalig-on sa joint training ug educational opportunities.
Sa pagkakaron, nagpadayon ang Pilipinas ug Poland sa pagpalapad sa ilang kooperasyon sa seguridad, legal matters, trade, agriculture, science and technology ug digital cooperation, atol sa unang state visit sa usa ka Polish president sa Pilipinas.
