Nakaapekto na sa kapin 104,000 ka pamilya o kapin 388,000 ka indibidwal ang grabeng El Niño sa nagkadaiyang bahin sa nasod, sumala sa National Disaster Risk Reduction and Management Council o NDRRMC.
Base sa pinakabag-ong datos, padayon ang pagsaka sa gidaghanon sa mga pamilyang direktang naapektuhan sa grabeng hulaw.
Pinakadaghan ang naitalang apektado sa Cagayan Valley, gisundan sa Caraga, Calabarzon ug Bicol Region.
Tungod sa epekto sa hulaw sa suplay sa tubig ug panginabuhian, nagpabilin sa 106 ka local government units ang gipailalom sa State of Calamity sa tibuok nasod.
Lakip sa mga nagdeklara niini ang tibuok probinsya sa Occidental Mindoro, Sultan Kudarat ug Maguindanao, ingon man ang pipila ka lugar sa Palawan, Cebu ug Zamboanga City.
Dako usab ang epekto sa sektor sa agrikultura, diin mokabat na sa ₱5.5 bilyon ang gibanabanang kantidad sa nadaot nga pananom ug nawala nga kita sa mga mag-uuma ug mangingisda.
Samtang, milapas na sa ₱38 milyon ang kinatibuk-ang kantidad sa ayuda ug relief assistance nga naihatag sa gobyerno ngadto sa mga pamilyang naapektuhan sa El Niño.
Sa pagkakaron, padayon ang pagmonitor sa NDRRMC ug mga lokal nga kagamhanan sa kahimtang sa mga apektadong komunidad, samtang gipadayon ang paghatag og tabang aron matubag ang epekto sa grabeng hulaw.
