Gikuwestyon ni Senador Panfilo “Ping” Lacson ang giingong padayong reclamation sa bahin sa Laguna Lake sa Taguig samtang gisubay ang joint on-site inspection sa mga ahensya sa gobyerno.
Lakip sa niapil sa inspeksyon ang Office of the Ombudsman, Philippine Reclamation Authority, Land Registration Authority ug Department of Public Works and Highways.
Matud ni Lacson, padayon kuno ang reclamation sa maong bahin sa Taguig Lakeshore, diin namatikdan usab ang giingong paglabay og basura sa lugar.
Nahisgotan usab sa senador ang pipila ka personalidad nga base sa impormasyon nga nadawat sa iyang opisina adunay koneksyon sa mga Cayetano sa Taguig, apan gipasiugda nga kinahanglan pa kining maimbestigahan.
Samtang, gikuwestyon ni Senate Minority Leader Alan Peter Cayetano ang pamaagi sa pagdumala sa imbestigasyon sa mga alegasyon sa iregularidad sa mga proyekto sa Taguig.
Pagpasabot ni Cayetano nga iyang gitahod ang imbestigasyon sa Ombudsman, Department of Justice, National Bureau of Investigation ug ubang constitutional bodies, apan kinahanglan kining patas, factual, ug subay sa proseso.
Gipangutana usab niya ang pamaagi sa pagkuha og affidavits gikan sa mga contractor, nga mahimo kunong coercion kon pugson sila sa pagpirma sa giandam nang mga dokumento.
Nanawagan si Cayetano nga malikayan ang selective investigation ug overreach samtang nagpadayon ang pagsusi sa mga alegasyon.
