Nakatakdang motestigo si AMLC Executive Director Ronell Buenaventura sa impeachment trial ni Vice President Sara Duterte pagka Oktubre 5, 2026 human nangayo ang defense team og dugang panahon aron masusi ang mga dokumentong isumite sa Senado.
Kahinumdoman nga motestigo unta si Buenaventura kaniadtong Oktubre 1 aron ipresentar ug pamatud-an ang mga report sa Anti-Money Laundering Council may kalabotan sa financial transactions nga nalambigit kang Vice President Sara Duterte ug sa iyang bana nga si Atty. Manases Carpio.
Sumala ni lead defense counsel Atty. Sheila Sison, nadawat lamang sa depensa ang mga summary sa AMLC reports pasado alas-11:00 sa buntag kaniadtong Oktubre 1, busa nanginahanglan pa sila og panahon aron masusi ayha ipahigayon ang direct examination ug cross-examination sa testigo.
Misupak usab ang depensa sa paggamit sa mga AMLC records isip ebidensiya tungod sa confidentiality provisions ubos sa Anti-Money Laundering Act.
Apan, giinsistir sa House prosecution nga dili mahimong babag ang maong confidentiality provision sa legal nga subpoena nga giisyu sa Senate Impeachment Court. Nagkayaon usab House prosecutor Chel Diokno nga ang Section 8-A sa amended Anti-Money Laundering Act nagtumong sa pagpugong sa unauthorized disclosure sa impormasyon ug dili angay gamiton isip blanket protection batok sa subpoena sa impeachment court.
Nauna nang gitugotan sa impeachment court ang paggamit sa AMLC records isip ebidensiya sa pagtaral. Gipadayon usab ni Senate Impeachment Court Presiding Officer Francis Escudero ang naunang ruling, apan gihatagan og dugang panahon ang depensa pinaagi sa pagbalhin sa testimonya sa Oktubre 5.
Nagpadayon ang impeachment case sa Article II nga nagtutok sa alegasyon sa unexplained wealth ug sa mga deklarasyon sa Statement of Assets, Liabilities and Net Worth o SALN sa bise presidente.
Lakip sa gisusi sa prosecution ang AMLC report nga nakatala og gibana-banang ₱6.7 bilyon nga aggregate transactions nga gikonektar sa mga bank account nila Duterte ug Carpio. Tumong sa prosecution nga itandi ang maong mga transaksyon sa declared income, assets ug uban pang financial interests sa mag-asawa.
