Nangayo og tabang ang Department of National Defense sa National Bureau of Investigation aron masuta ang nagpakalat sa giingong peke nga mga letter nga adunay pirma ni DND Secretary Gilberto Teodoro Jr.
Pagpaklaro ni DND Spokesperson Assistant Secretary Arsenio Andolong nga adunay sulod ang maong sulat kabahin sa operasyon sa Ayungin Shoal ug kooperasyon tali sa Pilipinas ug Estados Unidos.
Matud ni Andolong, klaro nga sayop ug peke ang maong sulat ug wala kini nagrepresentar sa opisyal nga posisyon sa DND.
Gitan-aw sa ahensya ang maong insidente isip posibleng foreign interference ug malign influence nga mahimong nagtumong sa pagdaot sa lehitimong mga lakang sa gobyerno alang sa pagbantay sa soberanya ug integridad sa Pilipinas.
Ang maong isyu, gidala na sa DND ngadto sa NBI aron imbestigahan kung kinsa ang nagpakuyanap sa pekeng dokumento ug unsa ang tumong niini.
Naka-address kang Peter Enzminger ang maong sinulay ug naghisgot sa operasyon sa Ayungin kaniadtong Hulyo 20, diin nasamdan ang pipila ka Navy personnel sa Pilipinas.
Gisulat usab sa maong dokumento ang giingong resulta sa operasyon ug mga alegasyon batok sa China, lakip ang giingong pagpang-bully.
Samtang, naghulat ang DND sa resulta sa imbestigasyon sa NBI aron matino ang gigikanan ug responsibilidad sa pagpakaylap sa maong pekeng sinulat.
