Mihapak sa Mexico ang kusog nga Hurricane Polo samtang nagpadulong sa Hawaii ang Hurricane Nolo, nga parehong nagdala og hulga sa kinabuhi ug kabtangan tungod sa kusog nga hangin, ulan ug pagbaha.
Sumala sa US National Hurricane Center o NHC, nahimong hingpit nga hurricane si Nolo niadtong Huwebes sa gabii ug gilauman nga magdala og 15 hangtod 30 pulgada nga ulan sa pipila ka bahin sa Hawaii.
Lakip sa gikabalak-ang lugar ang Big Island ug Maui, diin gipasidan-an ang mga residente batok sa posibleng delikadong pagbaha tungod sa kusog sa ulan nga mahimong madala sa bagyo.
Tungod sa hulga sa bagyo, nagpagawas na og emergency proclamation ang gobernador sa Hawaii ug nagpakilos og kapin 230 ka miyembro sa National Guard alang sa mga operasyon sa emerhensiya.Gisuspinde usab ang klase sa pipila ka lugar samtang nangandam ang mga otoridad sa posibleng pagkawala sa kuryente ug uban pang epekto sa bagyo.
Samtang, miabot sa Category 4 ug Category 5 ang Hurricane Polo samtang nagpadulong sa baybayon sa Mexico, diin nakaapekto ang dagkong mga balod ug pagbaha sa mga balay ug establisemento sa Lazaro Cardenas.
Dugang pa, nagpadala ang gobyerno sa Mexico og mokabat sa 15,000 ka security personnel sa mga probinsya sa Guerrero ug Michoacan aron motabang sa paspas nga pagbalhin sa mga residente sa mga lugar nga taas ang risgo sa pagbaha ug kusog nga balod.
Sa pagkakaron, padayon ang pagbantay ug pagpangandam sa mga otoridad sa Hawaii ug Mexico samtang gipaabot ang dugang nga epekto sa duha ka hurricane sa ilang tagsa-tagsa ka lugar.
