Gihangyo ni Senador Francis “Kiko” Pangilinan ang Department of Agrarian Reform o DAR nga palig-onon ang transparency sa pag-ila ug pag-apod-apod sa mga benepisyo ngadto sa mga agrarian reform beneficiary.
Gibutyag ni Pangilinan nga kinahanglan dali nga ma-beripika sa publiko ang mga benepisyaryo, proyekto, pasilidad ug negosyo nga gisuportahan sa DAR, ilabina tungod sa bilyon-bilyong piso nga pondo nga gipangayo sa ahensya alang sa 2027.
Lakip sa iyang gisugyot ang geotagging sa mga proyekto, pag-abli sa mga kontrata ug procurement documents, independent inspection, ug pagpagawas sa datos nga makapamatuod nga aktuwal ug naglihok ang mga proyektong gipondohan sa gobyerno.
Sa proposed 2027 budget, P14.69 bilyon ang gipangayo sa DAR, nga 13 porsyento nga mas ubos kumpara sa 2026 allocation. Gikan niini, P5.9 bilyon ang alang sa Agrarian Reform Beneficiary Development and Sustainability Program, lakip ang P949 milyon alang sa climate-resilient farm productivity support.
Gikuwestiyon ni Pangilinan kung igo ba ang maong pondo ug gipangayo nga klaro ang konkretong benepisyo niini ngadto sa mga mag-uuma.
Sa pagkakaron, padayon usab niyang giduso ang paggamit sa public transparency portal alang sa mga proyektong may kalabotan sa agrikultura, diin makita sa publiko ang geotagged project information, kontrata, procurement documents ug resulta sa independent quality testing.
