Nanawagan ang House prosecution panel sa Senate Impeachment Court nga iaplikar usab kang Vice President Sara Duterte ang sub judice rule human niya giingong wala siya mosalig sa impeachment court ug giakusahan ang mga senator-judge nga naimpluwensiyahan sa Malacañang.
Matud ni Prosecution spokesperson o Lanao del Sur Rep. Zia Alonto Adiong, kung estrikto nga ipatuman ang maong lagda sa tanang partido, apil usab niini ang respondent nga si Duterte.
Samtang, duha ka miyembro sa House prosecution panel ang nakadawat og show-cause orders tungod sa posibleng paglapas sa maong lagda. Lakip niini si Bicol Saro party-list Rep. Terry Ridon ug private prosecutor Atty. Benjamin Tolosa Jr.
Gipasabot sa sub judice rule ubos sa Rule 18 sa impeachment trial nga gidid-an ang prosecution, defense, respondent, witnesses ug senator-judges sa paghisgot sa publiko bahin sa merito sa pending nga kaso.
Ubos sa mas istriktong 2-strike nga lagda, ang unang paglapas mahimong mosangpot sa public reprimand ug stern admonition, samtang ang sunod nga paglapas mahimong adunay multa hangtod ₱30,000 matag offense ug posibleng limitasyon sa pag-apil sa hearing.
Sumala pa ni Adiong nga ang prosecution andam motahod sa desisyon sa impeachment court, apan iyang gipasiugda nga ang sub judice rule kinahanglan ipatuman nga parehas sa tanang partido.
