Gihugtan sa Philippine National Police ang seguridad sa Bangsamoro Autonomous Region in Muslim Mindanao (BARMM) samtang nagkaduol ang parliamentary elections sa rehiyon.
Matud ni PNP Public Information Office chief Police Colonel Allen Rae Co, gipataas na sa full alert status ang Bangsamoro Region aron masiguro ang kahapsay ug kalinaw atol sa pagpangandam sa eleksyon.
Ang maong alert status magpadayon hangtod sa katapusan sa bulan diin gimandoan ang 100% sa mga kapulisan nga magpabilin sa ilang mga assignment area.
Miabot na sa 10,439 ka mga pulis ang gipakatap sa BARMM aron magbantay sa nagkalain-laing lugar ug motubag sa posibleng hulga sa seguridad.
Padayon usab ang pangolekta og impormasyon sa mga otoridad batok sa bisan unsang grupo nga mahimong makasamok sa proseso sa maong piniliay.
Sa pagkakaron, adunay 27 ka lugar sa BARMM nga gibutang sa red category tungod sa mas taas nga risgo sa seguridad. Lakip niini ang 21 ka lugar sa Lanao del Sur, tulo sa Maguindanao del Sur, ug tig-usa sa Maguindanao del Norte, Basilan, ug Special Geographic Area.
Gipasalig sa PNP nga ipadayon ang koordinasyon uban sa mga lokal nga ahensya aron masiguro ang malinawon ug hapsay nga pagpahigayon sa eleksyon.
