Gipanalipdan sa Malacañang ang pagtudlo kang kanhing Senador Manny Pacquiao isip bag-ong lead convenor sa National Anti-Poverty Commission (NAPC), tungod sa iyang personal nga kasinatian sa kakabos ug dugay nang pagtabang sa mga vulnerable sector.
Matod ni Palace Press Officer Claire Castro, usa sa mga gikonsiderar sa pagpili kang Pacquiao mao ang iyang pagka-pamilyar sa kahimtang sa mga naa sa marginalized nga sektor ug ang iyang tinguha nga makatabang sa mga nanginahanglan.
Nanumpa na si Pacquiao kang President Ferdinand Marcos Jr. isip NAPC Secretary ug lead convenor kaniadtong Septyembre 8, 2026.
Pangunang katungdanan sa ahensya ang pag-coordinate sa mga polisiya ug programa sa gobyerno alang sa poverty reduction, ilabina para sa basic sectors.
Gihulipan ni Pacquiao si Lope Santos III isip lead convenor sa National Anti-Poverty Commission.
Dugang pa ni Usec. Castro, wala maghatag og rason ang Malacañang sa nahimong pag-ilis sa liderato sa komisyon.
Pasiugda usab sa Palasyo nga ang kasinatian ni Pacquiao sa kakabos ug iyang mga nahimong tabang sa mga komunidad mahimong magamit sa iyang bag-ong papel sa NAPC.
Sa pagkakaron, gipaabot ang mga programa ug lakang nga ipatuman ni Pacquiao isip bag-ong lead convenor sa komisyon alang sa mga Pilipino.
