Gihangyo ni Senador Erwin Tulfo nga personal nga paatubangon sa Senate Impeachment Court sila Col. Raymund Lachica ug Col. Dennis Nolasco aron matubag ang mga pangutana bahin sa paggamit sa confidential funds ni Vice President Sara Duterte.
Namention ang duha ka military officials sa impeachment trial tungod sa giingong pagdawat nila og milyon-milyong pisong confidential funds alang sa pagpatuman sa mga programa sa Office of the Vice President ug Department of Education.
Matod ni Tulfo, gusto sa mga senator-judges nga direktang pangutan-on ang duha kung asa gigamit ang maong pondo ug aron sila mismo makahatag og katin-awan sa korte.
Apan sumala kang Lead Prosecutor Rep. Gerville Luistro, nakadesisyon na ang House prosecution panel nga dili na ipaatubang ang duha ka military colonel.
Gipatin-aw ni Luistro nga nakompleto na sa prosecution ang mga ebidensya nga gusto nilang ipresentar bahin sa giingong iregularidad sa paggamit sa confidential funds ni Duterte.
Samtang, gipasiugda ni Trial Presiding Officer Sen. Chiz Escudero nga adunay gahum ang impeachment court nga ipatawag ang duha ka opisyal kung makita nga gikinahanglan ang ilang testimonya.
Mahimo kini sa dili pa maghatag og desisyon ang impeachment court bahin sa kaso batok sa Bise Presidente.| VIA BOMBO EROS PAJOTA
