Misaka sa hapit 3,000 ang gidaghanon sa mga gikatahong nawala human sa makamatay nga flash flood sa utlanan sa Nepal ug Tibet sa China.
Base sa pinakabag-ong datos, 633 na ka lawas ang narekober, lakip ang 626 ka namatay sa Nepal ug pito sa Tibet.
Sa Nepal, 2,426 ka tawo, lakip ang gatosan ka langyaw, ang wala pa makontak, samtang 554 ang gikatahong nawala sa Tibet.
Matod sa Red Cross, gibanabanang moabot sa 93,000 ka tawo ang naapektuhan sa kalamidad, diin gipaabot nga mosaka pa ang ihap sa mga namatay.
Lakip sa mga gikatahong nawala ang mga trabahante sa hydropower projects, trekkers ug mga pilgrim nga padulong sa sagradong Mount Kailash sa Tibet.
Samtang, padayon ang operasyon sa mga rescue team sa duha ka nasud bisan pa sa hulga sa dugang nga pagbaha.
Sa India, pito na usab ka lawas ang narekober gikan sa mga suba nga gikan sa Nepal ug gituohang mga biktima sa baha.
Sumala sa mga nakalahutay, kusog kaayo ang pag-abot sa baha nga dala ang yelo, lapok ug mga debris, hinungdan nga daghang komunidad ang hapit hingpit nga nahimong kaguba.
