Mikabat sa pito ka tawo ang kumpirmadong namatay, samtang siyam pa ang padayong gipangita human mibuto ug nasunog ang Amur Gas Chemical Complex sa Russian Far East.
Sumala pa sa mga taho, nahitabo ang pagbuto samtang gipahigayon ang startup operations sa maong dakong pasilidad.
Nasamdan usab ang kapin 150 ka trabahante, nga nakaangkon og nagkalain-laing kadaot sa lawas tungod sa maong insidente.
Lakip sa maong pasilidad ang Amur Gas Chemical Complex, usa ka dakong joint petrochemical project tali sa Russia ug China nga gitukod aron mapalambo ang produksyon sa mga kemikal ug enerhiya sa maong rehiyon.
Dugang pa niini, gipalig-on sa mga awtoridad ang search and rescue operations aron pangitaon ug luwason ang siyam ka trabahante nga gikatahong nawala human sa maong insidente.
Sa kasamtangan, nagpadayon ang imbestigasyon aron matino ang tukmang gigikanan ug hinungdan sa pagbuto ug sunog.
