Nagdonar og ₱100,000 ang Eastern Mindanao Command o EastMinCom ngadto sa House of Hope Foundation for Kids with Cancer, Inc. sa Southern Philippines Medical Center sa Davao City niadtong Agosto 24, 2026.
Ang donasyon gikan sa kinitaan sa “Drive for Hope 5.0” Charity Golf Tournament nga gipahigayon isip kabahin sa ika-20 nga founding anniversary sa EastMinCom.
Gipangulohan ni EastMinCom Commander Lt. Gen. Adonis Ariel G. Orio PA ang turnover sa donasyon ngadto sa foundation. Lakip usab sa ilang gihatag ang mga dulaan ug educational materials alang sa mga batang nagpa-treatment sa House of Hope.
Matod ni Orio, tumong sa kalihokan nga makahatag og dugang suporta ug paglaum sa mga batang nakigbisog batok sa kanser ug sa ilang mga pamilya.
Dugang pa, gipasiugda sa EastMinCom nga ang ilang serbisyo dili lamang naka-focus sa seguridad ug pagpanalipod sa komunidad, apan apil usab ang pagtabang sa mga nanginahanglan.
Ang House of Hope Foundation nagpadayon sa paghatag og suporta sa mga batang adunay kanser nga nagpa-treatment sa SPMC, diin ang maong donasyon makatabang sa ilang padayong mga programa ug panginahanglan.| VIA BOMBO EROS PAJOTA
