Gibutyag ni National Bureau of Investigation Director Melvin Matibag nga adunay giimbestigahang grupo sa giingong “groomers” nga nag-recruit ug nag-aghat sa mga menor de edad sa pagbuhat og bayolenteng kalihokan.
Matod ni Matibag, target sa grupo ang mga kabatan-onan nga nag-edad 12 hangtod 19 anyos pinaagi sa group chats, diin una silang duolon, ilhon ang ilang personal nga background ug sa ulahi tudloan kuno sa mga delikadong buhat.
Gikumpirma usab sa NBI nga nakasulod sila sa maong group chat, apan nawala o nabungkag kini ayha mahuman ang ilang pagsusi.
Dugang pa, gibanabana ni Matibag nga mokabat sa halos 1,000 ang mga miyembro, kadaghanan mga Pilipino, ug adunay gikan sa ubang nasod.
Gisusi karon sa NBI kung adunay koneksyon ang grupo sa Ateneo de Zamboanga University shooting ug sa ubang bag-ong school violence incidents.
Lakip sa ilang gina-profile ang mga tawo nga nag-share o mitan-aw sa livestream sa maong insidente.
Sa pagkakaron, nakig-coordinate usab ang NBI sa Meta, Department of Information and Communications Technology (DICT) ug Cybercrime Investigation and Coordinating Center (CICC) aron mapalig-on ang imbestigasyon sa online radicalization ug harmful content.
