Nagpahamtang ang Canada og counter-tariffs nga moabot hangtod 50 porsyento sa nagkalain-laing produkto gikan sa Estados Unidos isip tubag sa bag-ong taripa nga gipahamtang sa administrasyon ni US President Donald Trump.
Matod sa Canadian government, mokabat sa halos C$28 bilyon ang kantidad sa mga produktong maapektuhan, lakip na ang steel, aluminum, furniture, fresh tuna, clothing, honey, makeup, perfume, appliances ug pipila ka dairy ug seafood products.
Gilauman nga magsugod ang bag-ong taripa sa Septiyembre 8, 2026.
Nagkanayon si Finance Minister François-Philippe Champagne, nga gitumong ang maong lakang nga mahimong proportional ug strategic human mapakyas ang pinakabag-ong trade talks tali sa duha ka nasod.
Dugang pa, maghatag ang Canada og C$7.5 bilyon nga support programs alang sa mga negosyo ug trabahanteng maapektuhan sa US tariffs.
Sa laing bahin, gibasol sa White House ang Canada sa pagkapakyas sa negosasyon, samtang gipanghimakak sa Ottawa nga patas ang bag-ong US trade measures.
Sa pagkakaron, nagpadayon ang tensiyon samtang gikabalak-an ang epekto niini sa presyo, supply chains ug relasyon sa duha Canada ug Estados Unidos.
