Misaka na sa P3 bilyon ang kantidad sa kadaot nga nahiaguman sa sektor sa imprastraktura sa Cordillera Administrative Region (CAR) tungod sa sunod-sunod nga mga kalamidad nga miresulta sa mga pagdahili sa yuta ug lapad nga pagbaha.
Sulod sa kapin tulo ka semana nga padayon nga pag-ulan, daghang road network sa maong rehiyon ang naapektuhan, samtang pipila ka mga estruktura sama sa mga balay ang nangaguba.
Lakip sa mga nadaot ang pipila ka bahin sa road network nga nagkonektar sa Cordillera Administrative Region, Cagayan Valley Region, ug Central Luzon, mga rock netting project sa Benguet, ug uban pang public infrastructure projects.
Matod ni Department of Public Works and Highways (DPWH) Secretary Vince Dizon, posible pang mosaka ang kantidad sa kadaot samtang nagpadayon ang assessment ug validation sa mga epekto sa kalamidad.
Bisan nagpadayon pa ang validation, misaad ang kalihim nga adunay igong pondo alang sa daliang rehabilitasyon sa mga nadaot nga imprastraktura.
Sumala kang Dizon, usa sa mga nag-unang prayoridad karon sa DPWH ug sa national government mao ang pag-ayo ug rehabilitasyon sa mga nadaot nga imprastraktura aron matabangan ang Cordillera sa pagbangon gikan sa epekto sa mga kalamidad.
Mokabat sa 15 ka indibidwal ang namatay sa tibuok Cordillera sa milabay nga mga semana tungod sa rain-induced landslides o mga pagdahili sa yuta nga gipahinabo sa kusog ug padayon nga pag-ulan.
Gipasalig usab ni Dizon nga tutokan sa DPWH ang ubang mga rehiyon nga nakarekord usab og kadaot sa imprastraktura tungod sa sunod-sunod nga mga kalamidad.
| via Bombo Ray Ann Martinez
