Gisusi sa paghimo sa Tunneling method, nga dalan sa Pilipinas tungod sa kalamidad.
Gisugyot ni Presidential Adviser on Cordillera Affairs Assistant Secretary Antonio Tabora ang paggamit sa tunneling method sa paghimo sa mga dalan sa Pilipinas isip lakang batok sa kanunay nga kadaot nga dala sa mga kalamidad.
Matod pa ni Tabora, gikinahanglan nang ikonsiderar sa gobyerno ang maong pamaagi ilabina sa mga bulubukid nga rehiyon nga sagad maapektuhan sa mga bagyo, pagbaha ug landslide.
Dugang pa niini, daghang mga dalan ang kanunay nga madaot tungod sa baha, pagkahugno sa yuta ug pagkahulog sa dagkong mga kahoy atol sa kusog nga pag-ulan ug bagyo.
Sumala pa sa opisyal, mahimong mas mapanalipdan sa tunneling method ang mga dalan batok sa mga rain-induced damage ug makapamenos usab sa panginahanglan sa kanunay nga pagmintinar niini.
Sa pagkakaron, gikonsiderar pa ang maong pamaagi isip usa sa mga posibleng solusyon aron mapalig-on ug mapadayon ang kaluwasan ug pagka-accessible sa mga dalan sa mga lugar nga kanunay maigo sa kalamidad.
