Nakatala ang National Kidney and Transplant Institute og lima ka pasyenteng namatay tungod sa leptospirosis human sa sunod-sunod nga pag-ulan ug pagbaha nga dala sa Habagat.
Mikabat na sa 19 ang leptospirosis cases sukad Hunyo ning tuiga, diin ang pinakabag-ong biktima namatay human miabot sa pulmonary hemorrhage ang komplikasyon.
Dugang pa, gipahayag ni NKTI nephrologist Dr. Arlene Lamban-Crosson nga daghang pasyente ang moabot sa ospital nga severe na ang kondisyon tungod kay ulahi na mailhan ang sintomas.
Lakip sa unang timailhan ang hilanat, sakit sa lawas ug kasu-kasuan, ug pamula sa mata.
Kung mograbe, mahimong mosunod ang pagka-yellow sa panit kon mata, pagkunhod sa ihi, ug pag-ubo o pagsuka og dugo.
Sa San Lazaro Hospital sa Manila, mikabat na sa 50 ang kaso, lakip na usab ang 24 ka bag-ong admission sulod sa 24 oras, samtang duha na ang namatay.
Sa pagkakaron, gipasidaan ang publiko nga likayan ang baha ilabina kung adunay samad.
