Gibutyag ni Senate President Sherwin Gatchalian nga adunay na’y consensus o kinatibuk-ang kasabutan ang mga senator-judges nga ibalik sa hapon ang impeachment trial ni Vice President Sara Duterte aron mapadali ang dagan sa mga pagdungog.
Sumala pa ni Gatchalian, usa sa ilang gikonsiderar ang pagbalik sa trial sa hapon tungod kay limitado ang oras kung buntag kini himuon, ilabina kay kinahanglan kining isuspinde aron mahatagan og panahon ang regular nga sesyon sa Senado sa hapon.
Dugang pa niini, bisan adunay na’y kasabutan ang mga senator-judges, pormal pa kining ipahibalo ug ipatuman sulod niining semanaha.
Kahinumduman nga una nang gisugyot ni Senator-Judge Juan Miguel “Migz” Zubiri nga ibalik sa hapon ang impeachment trial, samtang himuon sa buntag ang regular nga sesyon sa Senado.
Lakip sa iyang rekomendasyon ang pagpatuman sa impeachment trial sugod alas-3 sa hapon hangtod sa gabii aron mahatagan og igong panahon ang prosekusyon ug depensa sa pagpresentar sa ilang tagsa-tagsa ka mga argumento.
Gipunting usab nga tumong sa pag-usab sa iskedyul ang pagpadali sa trial aron mahuman kini sa labing dali nga panahon ug makabalik ang Senado sa normal nga buluhaton sa paghimo og mga balaod.
Sa pagkakaron, ginahimo ang impeachment trial gikan alas-10 sa buntag hangtod alas-2 o alas-3 sa hapon, apan kanunay kining gisuspinde aron mahatagan og panahon ang regular nga sesyon sa Senado.
Dugang pa, ang mga testigo nga gilauman unta nga usa lang ka adlaw mosaksi usahay moabot og tulo ka adlaw tungod sa limitado nga oras. Nadugay usab og duha hangtod tulo ka adlaw ang pipila ka pagdungog tungod sa mga pagsuspinde nga resulta sa mga kalamidad nga giatubang sa nasod.
Sa kasamtangan, gipaabot ang pormal nga pagpahibalo ug pagpatuman sa bag-ong iskedyul sulod niining semanaha.
