Gi-aresto sa National Bureau of Investigation (NBI) ang job order employee niini human giingong nangayo og kwarta sa mga negosyante sa Mindanao gamit ang ngalan sa ahensya ug ni NBI Director Melvin Matibag.
Subay sa report, naglibot-libot matud pa ang suspek sa nagkalain-laing bahin sa Mindanao ug nagpaila nga gimandoan siya sa NBI director nga mangolekta og kwarta isip protection money gikan sa pipila ka indibidwal ug negosyo.
Nagpahigayon ang NBI og entrapment operation human makadawat og reklamo gikan sa usa ka taas nga opisyal sa gobyerno sa Mindanao diin naaresto ang suspek kauban ang driver niini.
Gibutyag ni NBI Director Melvin Matibag nga mikabat sa ₱1.7 milyon ang giingong nakolekta sa suspek.
Nagkanayon ang NBI chief nga wala siya nagmando sa bisan kinsa nga mangolekta og kwarta alang kaniya.
Gituohan usab sa NBI nga dugay na nga gihimo sa suspek ang maong pagpangolekta ug aduna pa kini usa ka kauban sa Mindanao aron motabang sa pagkuha sa kwarta.
Balhug na sa prisohan ang suspek ug nag atubang og mga kasong robbery extortion, usurpation of authority, ug illegal possession of firearms.
Gipahimangnoan ni Director Matibag ang publiko batok sa mga tawo nga mogamit sa ngalan sa NBI o sa iyang opisina alang sa ilegal nga mga kalihokan.
Nagpasidaan usab kini sa negosyante ug ubang indibidwal nga i-report dayon sa NBI ang bisan kinsang mangayo og kwarta o maghimo og demand gamit ang ngalan sa ahensya.
