Giawhag ni Cardinal Antonio Tagle ang mga ginikanan nga mas tutokan ang paggiya sa ilang mga anak human sa sunod-sunod nga insidente sa school violence sa nasod.
Matod pa ni Tagle, importante nga ipakita sa mga ginikanan ug apohan ngadto sa kabataan ang makatawhanong pagtratar sa isigkatawo ug hustong paghimo og desisyon.
Gipahayag usab sa Cardinal ang iyang kasubo sa pagpamusil sa Ateneo de Zamboanga University nga miresulta sa kamatayon sa duha ka estudyante.
Atol sa iyang misa sa Parish Church of the Holy Sacrifice sa UP Diliman, gipangutana ni Tagle kung unsay mahimong nagtukmod sa kasingkasing sa usa ka bata aron magplano og kapintasan.
Dugang pa, iyang gipasiugda ang panginahanglan sa tinuod nga komunikasyon ug relasyon sulod sa pamilya imbes nga kanunay matutok sa cellphone.
Gipahimangnoan usab niya nga dili angay magsalig pag-ayo ang kabataan sa video games ug artificial intelligence isip giya sa ilang mga desisyon.
Sa pagkakaron, gidasig ni Tagle ang matag pamilya nga palig-onon ang pag-istoryahanay, paggiya ug pag-atiman sa kabataan. | VIA BOMBO EROS PAJOTA
