Gipuntirya ni Pangulong Ferdinand Marcos Jr. nga sa pagtapos sa iyang termino sa 2028, makabilin siya og kultura sa padayong kalamboan ug nation-building, lakip ang mas taas nga pagsalig sa publiko sa gobyerno.
Sa usa ka interbyu, gipahayag ni Pangulong Ferdinand Marcos Jr. nga gusto niyang makita ang usa ka gobyerno nga kauban ang katawhan ug nagkalain-laing sektor sa pagpauswag sa nasod.
Lakip sa iyang mga tumong ang mas daghang trabaho ug panginabuhian, padayong pag-uswag ug mas aktibong partisipasyon sa Pilipinas sa pangkalibutang ekonomiya.
Gipasiugda usab sa Pangulo ang importante nga papel sa mga lokal nga pangagamhanan sa paghatod sa serbisyo tungod kay mas nasayod kuno kini sa kahimtang ug panginahanglan sa ilang mga komunidad.
Matud ni Pangulong Ferdinand Marcos Jr., mas mahimong duol sa katawhan ang gobyerno kung mas mapalig-on ang mga local government unit (LGU).
Dugang pa sa Pangulo nga wala siya magdahom nga mahimong perpekto ang iyang pagdumala, apan naglaum siya nga mahuman niya ang iyang termino nga adunay makahuluganon nga kontribusyon sa kalamboan ug pagpalig-on sa nasod.
| via Bombo Ray Ann Martinez
