Mga 1,000 ka tawo ang gipabakwit sa tourist town sa Omis, Croatia human kusog nga wildfire nga gitukmod sa hangin mikaylap ngadto sa mga kabalayan ug kalasangan kagabii.
Nasunog ang kapin 1,000 hectares nga lugar, samtang 36 ka tawo ang gitambalan sa ambulance services sa Split. Napulo ug upat ang gi-admit sa ospital ug pito niini ang giingong anaa sa kritikal nga kahimtang.
Gibuksan usab ang emergency shelters sa pipila ka lungsod tali sa Omis ug Split alang sa mga residente ug turista nga mipahawa sa ilang mga balay.
Matud ni Chief Fire Commander Slavko Tucakovic, dako ang kadaot nga nahibilin sa sunog bisan mikalma na kini karong buntaga ug wala nay open flames sa Omis.
Mga 286 ka bombero, 90 ka fire vehicles ug upat ka aircraft ang gigamit sa firefighting operations.
Gisira usab ang bahin sa major coastal highway tungod sa insidente.
Samtang, adunay laing wildfire nga gitubag sa Peljesac peninsula, diin gibalhin ang pipila ka firefighter ug aircraft gikan sa Omis. | VIA BOMBO EROS PAJOTA
