Giila sa Department of Energy ang pito ka posibleng lugar sa lima ka probinsya diin mahimong tukoran og nuclear power plants isip kabahin sa plano sa gobyerno nga makadugang og 1.4 gigawatts nga nuclear capacity sulod sa 12 ka tuig.
Duha sa mga lugar anaa sa Bataan, duha sa Palawan, samtang tagsa ang Masbate, Pangasinan ug Camarines Norte.
Matud ni Energy Usec. Giovanni Carlo Bacordo, nakapasar ang mga lugar sa preliminary evaluation ug field surveys. Kapin duha ka kilometro kini gikan sa active faults, labing menos 12 metros ibabaw sa sea level ug wala sa danger zones sa active volcanoes.
Gisunod matud pa sa DOE ang safety standards sa International Atomic Energy Agency.
Gitan-aw usab sa gobyerno ang public-private partnerships, consortium arrangements ug uban pang financing options alang sa nuclear projects.
Target sa nuclear roadmap nga matukod ang unang 1,200-megawatt plant sugod 2028 ug ma-connect sa power grid sa 2032, samtang gitinguha nga moabot sa 4,800 megawatts ang nuclear capacity sa nasud sa 2050.
Gisusi usab sa gobyerno ang posibilidad nga i-rehabilitate ang 620-megawatt Bataan Nuclear Power Plant, nga nahuman kaniadtong 1980s apan wala gayud nakaproduce og commercial electricity.
