Nakapahibalo ang Philippine National Police o PNP nga mokabat sa 15 ka tawo ang gikatahong namatay tungod sa mga insidente nga may kalabotan sa Habagat o southwest monsoon.
Sumala kang PNP Public Information Office Chief Col. Allen Rae Co, duha ka kamatayon ang natala sa Police Regional Office 1 tungod sa pagkuryente ug pagkalumos.
Pito usab ang gikatahong namatay sa Region 4A tungod sa nagkalain-laing insidente sama sa pagkatagak sa mga bato ug landslide, pagkalumos, pagkuryente ug pagkahulog sa mga kahoy.
Samtang, unom ka kamatayon ang gitaho sa Police Regional Office Cordillera tungod sa mga landslide.
Lakip sa mga lugar nga naapektuhan ang La Union, Pangasinan, Rizal, Batangas, La Trinidad sa Benguet ug Baguio City.
Gikataho usab nga 13 ka tawo ang nasamdan ug unom ang gikonsiderar nga missing tungod sa mga insidente nga may kalabotan sa panahon.
Apan giklaro ni Co nga ang maong mga numero wala pa pinal ug padayon pang gipamatud-an sa mga otoridad.
Kapin 3,000 ka pulis ang gipadala sa mga lugar nga naapektuhan sa Habagat aron motabang sa search, rescue ug uban pang response operations. | VIA BOMBO EROS PAJOTA
