Nakigalayon ang Davao City Police Office o DCPO sa mga opisyal ug magtutudlo sa Teofilo V. Fernandez National High School sa Indangan, Buhangin District, Davao City, human sa giingong bomb threat niadtong Agosto 6, 2026.
Gipahigayon ang school visitation karong Agosto 10 ubos sa pagpanguna ni PCOL Peter B. Madria, City Director sa DCPO, kauban si PMAJ Paul Michael Neffe, Station Commander sa Police Station 13-Mandug.
Gidawat sila ni School Principal Elma P. De Castro ug sa mga magtutudlo sa maong eskwelahan alang sa usa ka panaghisgot kabahin sa seguridad sa mga estudyante ug personnel.
Gipasiugda ni Madria ang kamahinungdanon sa pagkab-ot sa maayong koordinasyon tali sa eskwelahan ug kapulisan aron malikayan ang posibleng hulga sa seguridad.
Giawhag usab ang mga estudyante ug magtutudlo nga magmatngon ug i-report dayon sa kapulisan ang bisan unsang kadudahang kalihokan o butang nga ilang makita.
Matud sa DCPO, kabahin kini sa ilang paningkamot nga mapalig-on ang presensya sa kapulisan sa komunidad, mapalambo ang pagsalig sa publiko ug masiguro ang kaluwasan sa mga estudyante ug tibuok komunidad. | VIA BOMBO EROS PAJOTA
