Giingong naantala ang imbestigasyon sa Philippine Reclamation Authority o PRA kabahin sa reclamation activities sa Taguig City human gi-pressure kuno ni kanhi Senate President Alan Peter Cayetano ang mga opisyal sa ahensya atol sa budget deliberations niadtong Nobyembre 2025.
Sumala kang Senador Panfilo “Ping” Lacson, base sa impormasyon nga iyang nadawat gikan sa mga opisyal sa PRA, gipatawag kuno sila ni Cayetano ug gihulga nga ipahunong ang deliberasyon sa budget sa Office of the President.
Matud ni Lacson, nakahatag kini og pressure sa mga opisyal sa PRA ug misangpot sa pagkalangan sa ilang imbestigasyon sa reclamation sa Taguig.
Gibutyag usab sa senador nga ipadayon sa PRA ang imbestigasyon sa ektaryang yuta diin nahimo ang giingong ilegal nga reclamation.
Gikumpirma usab kuno sa PRA nga walay reclamation permit nga nakuha ang Taguig City government alang sa maong proyekto. Matud ni Lacson, kon mapamatud-ang walay permit ang reclamation, mahimong ma-forfeit ang reclaimed land pabor sa national government.
Samtang, anaa na sa Ombudsman ang mga dokumento ug affidavit sa mga testigo kabahin sa giingong anomalya sa flood control projects sa Taguig.
Wala na usab pugsa ni Lacson ang Senate Blue Ribbon Committee sa pagpahigayon og hearing ug gipasagdan na kini kang Chairman Erwin Tulfo. Sa pagkakaron, gihulat pa ang tubag ni Cayetano sa maong mga alegasyon.
