Misaka og 18.5 porsyento ang gibayran sa gobyerno sa iyang mga utang niadtong Hunyo, tungod sa pagsaka sa principal payments ug interest costs.
Base sa datos sa Bureau of the Treasury o BTr, mikabat sa 77.2 bilyong pesos ang debt payments sa gobyerno niadtong Hunyo, mas taas kumpara sa 65.1 bilyong pesos sa samang bulan niadtong 2025.
Tungod niini, mikabat na sa 1.226 trilyong pesos ang kinatibuk-ang gibayran sa national government sa unang unom ka bulan sa tuig, halos 60 porsyento nga mas taas kumpara sa 768.1 bilyong pesos sa samang panahon niadtong miaging tuig.
Ang maong kantidad katumbas na sa 61.1 porsyento sa 2.005 trilyong pesos nga gitakdang debt service program alang sa tibuok 2026.
Niadtong Hunyo lamang, misaka og 91.5 porsyento ang amortization ngadto sa 14.8 bilyong pesos, samtang misaka usab og 8.7 porsyento ang interest payments ngadto sa 62.4 bilyong pesos.
Samtang, miabot na sa 19.07 trilyong pesos ang outstanding debt sa national government sa katapusan sa Hunyo, nga bag-ong rekord ug mas taas pa sa unang target alang sa unang tunga sa tuig.
Sa unang unom ka bulan, mikabat na sa 743 bilyong pesos ang amortization payments, o 70.4 porsyento sa tibuok tuig nga kantidad nga gitagana alang sa pagbayad sa principal sa utang.
