Gi-atake ang tulo ka Pilipinong seafarer sa Southwest England sa usa ka insidente nga gisusi sa mga otoridad isip posibleng hate crime. Sumala sa DMW, nahitabo ang insidente niadtong Hulyo 31 sa Avonmouth, England, samtang mihunong sa pantalan ang barkong gisakyan sa mga Pilipino. Usa sa mga biktima anaa sa kritikal nga kahimtang ug karon anaa sa intensive care unit, samtang duha pa ang nakaangkon og minor injuries.
Matud sa lokal nga kapulisan, adunay nakadungog kuno og mga racist remarks batok sa mga biktima, hinungdan aron isipon nga posibleng hate crime ang insidente samtang nagpadayon ang imbestigasyon. Gipatin-aw usab sa kapulisan nga walay ebidensyang migamit og kutsilyo batok sa mga biktima, sukwahi sa pipila ka impormasyon nga mikaylap online.
Dugang pa niini, upat na ka tawo ang gidakop may kalabotan sa insidente, lakip ang 19-anyos ug 45-anyos nga mga lalaki, 17-anyos nga binatilyo ug 38-anyos nga babaye. Sa kasamtangan, giila sa kapulisan ang insidente isip isolated case, samtang padayon nga naghatag og tabang ang DMW sa London ngadto sa tulo ka Pilipino ug hugot nga gibantayan ang ilang kahimtang.
