Gikumpirma ni Philippine Ambassador Millicent Cruz-Paredes nga luwas ang walo ka Pilipinong magtutudlo human sa madugo nga insidente sa pagpamusil sa Debsirin Nonthaburi School sa Nonthaburi Province, duol sa Bangkok, Thailand, niadtong Biyernes, Agosto 7.
Sumala sa embahador, wala maangol ang mga Pilipinong magtutudlo ug sa pagkakaron anaa sila sa usa ka luwas nga lugar nga gitakda sa mga awtoridad.
Kahinumduman, pito ka tawo ang namatay samtang 15 ang nasamdan sa maong pagpamusil nga giingong gihimo sa usa ka 14-anyos nga suspek.
Subay sa inisyal nga imbestigasyon, gigamit sa suspek ang pusil sa iyang apohan. Giingong gipusil ug gipatay una niini ang iyang lolo ug lola sulod sa ilang panimalay sa wala pa moadto sa eskwelahan, diin mipabuto kini og kapin sa 26 ka bala, nga maoy hinungdan sa grabeng kahadlok ug kagubot sa mga estudyante ug mga magtutudlo.
Dugang pa niini, nagkalainlain pa ang mga taho kabahin sa nahitabo sa suspek. Adunay mga report nga nag-ingong napusil kini sa mga pulis, samtang adunay usab nag-ingon nga kini mismo ang mipusil sa iyang kaugalingon.
Sa kasamtangan, nagpabilin nga nagpadayon ang imbestigasyon sa mga awtoridad aron matino ang tibuok kahimtang sa maong trahediya, samtang gipadayag ni Thailand Prime Minister Anutin Charnvirakul ang iyang dakong kasubo ug giingong dili unta mahitabo ang ingon niini nga insidente sa ilang nasud.
