Nadiskobrehan sa mga awtoridad nga adunay kargang military ammunition ang Ukrainian cargo aircraft nga unang nalambigit sa insidente sa Leipzig/Halle Airport sa Germany, diin una nang gitaho nga adunay drone nga gikabitan og high military-grade explosive.
Sumala pa, nakumpirma sa mga forensic expert nga ang explosive device nga nakabit sa drone adunay high military-grade explosive.
Dugang pa niini, sumala sa wala nganli nga mga imbestigador, wala modetonar ang maong explosive device tungod sa giingong technical defect, nga maoy hinungdan nga napugngan ang mas grabe pang kadaot.
Tungod niini, mas gipakusgan sa mga awtoridad ang counterterrorism investigation sa Leipzig/Halle Airport, nga nagsilbing usa sa mga nag-unang cargo hub ug NATO military logistics center sa Germany ug giila nga kabahin sa kritikal nga imprastraktura sa nasud.
Matud pa ni German Interior Minister Alexander Dobrindt, ang maong insidente mahimong ikonsiderar nga usa ka hybrid attack, nga nagpakita sa nagkataas nga hulga sa seguridad sa Germany.
Dugang pa, gitakda nga makigtagbo si Dobrindt sa mga opisyal gikan sa Baltic states, Poland, Sweden, Norway, Denmark, ug uban pang nasud sa ulahing bahin sa Agosto aron hisgutan ang dugang nga pagpalig-on sa ilang kooperasyon sa depensa ug seguridad.
Sa kasamtangan, nagpadayon ang mga awtoridad sa pag-imbestigar sa ubang detalye sa insidente, lakip na ang pagpangita sa mga debris sa usa ka wala pa mailhing butang nga mitugpa usab sa laing cargo aircraft.
Kahinumduman, una nang gitaho nga ang drone nakit-an duol sa pipila ka Ukrainian Antonov An-124 cargo aircraft, nga giila isip usa sa labing dagkong cargo planes sa kalibotan.
Nakita usab sa usa ka mamamahayag sa Reuters ang mga pulis nga nagkolekta og ebidensiya duol sa usa sa mga eroplano.
Samtang, ang cargo aircraft nga natirahan sa wala pa mailhing butang nakahimo og go-around maneuver tungod kay sirado ang usa sa mga runway sa maong tugpahanan.
Bisan og adunay gamayng kadaot ang eroplano, luwas kini nga nakalanding sa Hanover, Germany.
Tungod sa maong insidente, temporaryong gisuspinde ang operasyon sa Leipzig/Halle Airport ug gibalhin ang pipila ka mga biyahe sa eroplano, lakip ang mga flight sa DHL.
Apan, sumala sa mga opisyal sa maong tugpahanan, mibalik na sa normal ang operasyon niini sa pagkakaron.
