Gikondena sa Department of Foreign Affairs (DFA) karong adlawng Biyernes, Agosto 7, 2026, ang pagbilin og mga lungon nga adunay mensahe batok sa China sa nagkalain-laing lugar sa Metro Manila.
Gitawag sa DFA nga usa ka “iresponsable at kawalang-galang” ang maong insidente nga dili gayod nila pagkonsintihon.
Gipasabot sa ahensya nga bisan og giila nila ang kagawasan sa pagpahayag, dili niini apil ang pagpanghadlok o hulga sa pagpanlupig batok sa bisan kinsang langyaw o opisyal sa laing nasud.
Matod pa niini, seryoso ang gobyerno sa iyang saad nga masiguro ang kaluwasan sa mga langyawng diplomat subay sa Vienna Convention.
Dugang pa, ang maong lihok dili nagpakita sa paagi sa gobyerno sa pagdumala sa relasyon sa ubang nasud.
Matod sa DFA, dili usab kini ang hustong paagi sa pagpahayag sa mga Pilipino sa ilang pagsaway sa mga sensitibong isyung politikal.
“The Philippine government reaffirms that it takes seriously its duties and obligations concerning the safety and security of foreign nationals and officials in the country, including those arising from the Vienna Convention on Diplomatic Relations and the Vienna Convention on Consular Relations,” matod pa sa DFA.
May kalabotan niini, nakigtambayayong na ang DFA sa mga awtoridad sa pagpatuman sa balaod aron mailhan ang mga responsable sa luyo sa maong giplanong lihok.
Sa sayo pa, lima ka gibiyaan nga mga lungon ang nagkalain-laag nakit-an sa mga dalan sa Maynila, Quezon City, Makati ug Caloocan karong Biyernes.
Ang lungon nga nakit-an sa Welcome Rotonda adunay hulagway ni Chinese President Xi Jinping, Foreign Minister Wang Yi, ug Ambassador Jing Quan.
