Nakarekord ang Office of Civil Defense (OCD) og upat ka namatay tungod sa hiniusang epekto sa Bagyong Luis, Bagyong Maymay ug habagat.
Sumala sa report sa OCD alas 6:00 sa buntag karong Biyernes, Agosto 7, 2026 duha sa mga namatay gikan sa Benguet tungod sa landslide, samtang duha usab ang namatay sa rockslide sa Rodriguez, Rizal.
Dugang pa niini, usa ka tawo ang naangol sa Benguet tungod gihapon sa pagdahili sa yuta, samtang wala pay natalang missing person.
Sa pagkakaron, nakaapekto na ang hiniusang epekto sa mga weather disturbance sa kapin 132,956 ka indibidwal o 39,879 ka pamilya sa Ilocos Region, Cagayan Valley, Central Luzon, Bicol Region, Zamboanga Peninsula ug Cordillera Administrative Region.
Lakip sa mga apektado, 6,215 ka indibidwal o 2,021 ka pamilya ang nagpabilin sa 61 ka evacuation centers.
Gikumpirma usab sa OCD nga 14 ka kabalayan ang nadaot, diin 13 ang partially damaged ug usa ang totally damaged.
Samtang, mihinay na ang Bagyong Maymay ug nahimo nang low-pressure area, apan padayon gihapon kining gibantayan sa PAGASA sulod sa Philippine Area of Responsibility. Gibantayan usab sa ahensya ang Typhoon Dolphin nga anaa na sa gawas sa PAR.
Matud sa PAGASA, magpadayon ang epekto sa habagat nga magdala og pag-ulan sa pipila ka bahin sa Luzon ug Visayas, ug gipasidan-an ang publiko batok sa posibilidad sa flash flood ug landslide ilabina panahon sa kusog nga pag-ulan.
