Padayon pa ang emergency restoration works sa Davao Light aron maibalik ang suplay sa kuryente sa mga nahibiling apektadong lugar sa Talomo ug Bangkal human sa emergency power interruption.Base sa update sa kompanya alas-6:10 sa buntag karong Agosto 1, nabalik na ang kuryente sa kadaghanang lugar nga naapektuhan, apan adunay pipila ka mga komunidad nga nagpabiling walay suplay sa elektrisidad.
Lakip sa apektado ang pipila ka bahin sa Central Park sa Bangkal, ubang lugar sa Talomo ug mga kasikbit nga komunidad. Matod sa Davao Light, ang paglangan sa hingpit nga pagpabalik sa serbisyo tungod sa usa ka utility pole nga nabangga sa Talomo–Puan Bypass Road, nga nanginahanglan pa og dugang oras sa pag-ayo.
Gipasalig sa kompanya nga padayon ang trabaho sa ilang mga emergency response team aron mapasig-uli ang suplay sa kuryente sa labing dali nga panahon. Samtang nagpadayon ang repair operations, gihangyo sa Davao Light ang publiko nga mag-amping ug likayan ang mga lugar nga adunay ginahimong trabaho alang sa ilang kaluwasan.
