Gikwestyon sa energy advocacy group nga Power for People Coalition (P4P) ang pagsupak sa Manila Electric Company (Meralco) batok sa gisugyot nga pagtangtang sa system loss charges sa bayronon sa kuryente.
Matod sa grupo, dili angay ipasa sa mga konsumidor ang gasto nga kabahin sa operasyon sa usa ka power distributor.
Giinsistir nila nga sama sa ubang negosyo, ang kompanya mismo ang angay mosalo sa ilang operational costs ug dili ang mga konsumidor.
Gipasiugda usab sa P4P nga ang angay lang bayran sa mga konsumidor mao ang aktuwal nga kantidad sa kuryente nga ilang gigamit, tungod kay ang kuryente usa ka batakang serbisyo ug dili luho.
Gihimo sa grupo ang maong pahayag human sa direktiba ni Pangulong Ferdinand Marcos Jr. atol sa iyang ikalimang State of the Nation Address (SONA) nga tangtangon na ang system loss charges sa electricity bill.
Una nang nagpahayag og kabalaka ang Meralco bahin sa maong inisyatibo.
Matod ni Meralco Chairman ug CEO Manuel V. Pangilinan, mahimong moabot sa bilyon-bilyong piso ang epekto niini sa tibuok industriya sa kuryente, hinungdan nga nagpabilin nga pangutana kung kinsa ang mosalo sa maong gasto.
Ang system loss mao ang kuryente nga mawala samtang gipadala gikan sa mga planta paingon sa mga panimalay ug establisimyento tungod sa teknikal nga mga hinungdan, lakip na ang pagkawala sa enerhiya sa transmission ug distribution lines, ingon man ang ilegal nga pagpangawat og kuryente.
