Nabalaka karon ang United Nations (UN) migration agency tungod sa pagdaghan sa mga tawo nga mailad ug mapugos sa pagtrabaho sa mga scam compound o ilegal nga online fraud centers sa pipila ka bahin sa Asya.
Sumala sa International Organization for Migration (IOM), libo-libong mga tawo gikan sa kapin 80 ka nasod ang giingong nadala sa maong mga operasyon human madani pinaagi sa peke nga mga job advertisement sa social media nga nagpasalig og taas nga sweldo ug maayong trabaho.
Makita ang pipila sa pinakadakong scam compound sa Myanmar, Cambodia, ug Laos, diin gibanabana nga moabot sa 300,000 ka mga trabahante ang gigamit sa paghimo og online scams batok sa mga biktima, apil na ang mga tigulang nga indibidwal sa mga nasod sa Kasadpan.
Apan sumala sa IOM, daghan usab sa maong mga trabahante ang mga biktima mismo sa human trafficking.
Sa ilang pag-abot sa maong mga lugar, giingong kuhaon ang ilang mga dokumento ug pugson sila sa pagpanglimbong online pinaagi sa pagpanghulga ug pagpangdaot.
Gawas niini, ang mga biktima giingong nakaagi usab og pag-abuso, trauma, ug dagkong utang human sila maluwas.Tungod niini, nanawagan ang IOM sa mga gobyerno sa Asya nga palig-onon ang ilang mga aksyon batok sa mga sindikato nga nalambigit niini.
