Magpagawas og bag-ong lagda ang Department of Energy (DOE) aron mapaspasan ug mapasayon ang pagpakabit sa solar panels ug battery storage systems sa mga kabalayan.
Matod kang Energy Secretary Sharon Garin, tumong sa maong lakang nga maminusan ang mga permit ug mga proseso nga agian sa mga pamilyang gustong mogamit og solar energy alang lamang sa ilang kaugalingong konsumo ug dili alang sa pagbaligya og kuryente ngadto sa distribution utilities.
Gilauman sa DOE nga mapagawas ang bag-ong palisiya sulod sa usa ka bulan.
Una niini, gihangyo ni Pangulong Ferdinand Marcos Jr. sa iyang ikalimang State of the Nation Address ang Kongreso nga dayong aprobahan ang Sariling Kuryente Act.
Matod sa Pangulo, ang maong sugyot balaodnon nagtumong sa paghimo nga mas yano, mas dali ug mas barato ang pagpakabit sa solar panels ug battery storage systems sa mga panimalay aron makatabang sa pagpakunhod sa gasto sa kuryente.
Dugang pa sa DOE, ang bag-ong polisiya nagsuporta sa tumong sa Sariling Kuryente Act nga maminusan ang red tape ug mapaspasan ang paggamit sa renewable energy sa mga kabalayan.
