Gilauman sa Philippine Atmospheric, Geophysical and Astronomical Services Administration kon PAGASA nga adunay duha hangtod upat ka bagyo ang posibleng mosulod sa Philippine Area of Responsibility karong bulan sa Agosto 2026.
Sumala sa Climate Outlook nga gipagawas sa weather bureau, gibanabana usab nga adunay duha hangtod tulo ka bagyo sa Setyembre, usa hangtod duha sa Oktubre, Nobyembre ug Disyembre, samtang wala hangtod usa ka bagyo ang gilauman sa Enero 2027.
Matod sa PAGASA, posible usab makasinati ang Pilipinas og mas grabeng epekto sa El Niño tali sa Oktubre 2026 ug Enero 2027. Posibleng adunay pipila ka bagyo ang mokusog ug mamahimong super typhoon.
Dugang pa sa weather bureau, gilauman ang hapit normal nga gidaghanon sa ulan sa kadaghanang bahin sa nasud karong Agosto, apan posibleng mas daghang ulan ang masinati sa pipila ka lugar sa Western Luzon.
Samtang, mas maminusan ang ulan sa pipila ka bahin sa Southern Luzon, Visayas ug Mindanao. Nagpasidaan usab ang PAGASA nga posibleng makasinati og dry spell sa ulahing bahin sa Agosto ang pipila ka lugar sa Eastern Visayas ug Mindanao, samtang posible usab ang hulaw sa Camarines Norte, Catanduanes, Biliran, Cebu, Negros Oriental, Northern Samar, Samar ug Siquijor.
