Nagpabiling luwas ang lebel sa tanang mga suba sa Davao City bisan adunay mga pag-ulan nga nasinati sa pipila ka bahin sa dakbayan.
Sumala sa City Disaster Risk Reduction and Management Office Operations Center kon CDRRMO-OpCen, ang tanang river channels sa siyudad nagpabilin sa Code Green o luwas nga lebel, busa wala pay hulga sa pagbaha gikan sa mga suba sa pagkakaron.
Base usab sa weather forecast sa CDRRMO-OpCen, ang Davao City gilauman nga makasinati og partly cloudy hangtod cloudy nga kahimtang sa panahon uban sa panagsang pag-ulan ug localized thunderstorms.
Dugang pa sa report, adunay Low Pressure Area kon LPA nga namatikdan sa sidlakan sa Borongan City, Eastern Samar, samtang ang localized thunderstorms maoy nagpadayon nga nakaapekto sa Davao Region.
Bisan wala pay direktang epekto ang LPA sa siyudad, posible gihapon ang kalit nga kusog nga ulan nga mahimong hinungdan sa flash flood ug landslide ilabina kon adunay grabeng dalugdog ug uwan.
Busa, gihangyo sa mga awtoridad ang mga Dabawenyo nga magpadayon sa pagmonitor sa mga weather advisories ug mag-amping ilabina ang mga nagpuyo sa ubos nga lugar ug duol sa mga sapa ug suba aron malikayan ang posibleng peligro.
