Gipahayag ni Pangulong Ferdinand “Bongbong” Marcos Jr. nga gilauman niyang makabenepisyo ang mga Pilipino sa Pax Silica Industrial Hub nga pagatukoron sa New Clark City, Tarlac, nga giandam isip sentro sa artificial intelligence (AI) manufacturing ug logistics sa nasud. Sumala pa, ang 1,600-ektaryang industrial hub gilauman nga makahimo og AI ecosystem nga makahatag og dekalidad nga mga trabaho, makapalig-on sa kapasidad sa industriya sa Pilipinas, ug makadasig sa pag-uswag sa ekonomiya.
Dugang pa niini, gikanayon ni Marcos nga ang maong proyekto mahimong mahinungdanong kabahin sa Luzon Economic Corridor, nga gilauman usab nga mahimong sentro sa advanced manufacturing sa global AI ug technology value chain. Lakip sa gilauman sa administrasyon nga ang proyekto makatabang sa pagdani og dugang pamuhunan ug pagpalambo sa industriya sa high technology sa nasud. Apan, nakadawat usab og batikos ang maong proyekto tungod sa giingong dakong konsumo niini sa kuryente ug tubig, nga kasagarang gikinahanglan sa mga AI facilities.
Matud pa ni ACT Teachers Party-list Representative Antonio Tinio, adunay kabalaka nga ang Pilipinas mahimong kabahin lamang sa supply chain sa military-industrial complex sa Estados Unidos ubos sa Pax Silica initiative. Dugang pa ni Tinio, imbis nga mahimong tinuod nga instrumento sa pagpalambo sa ekonomiya, posibleng magsilbi ang proyekto sa estratehikong interes sa Estados Unidos sa paghimo og semiconductors ug uban pang advanced electronics nga mahimo usab gamiton alang sa military applications. Sa kasamtangan, wala pa motubag ang Malacañang sa mga kabalakang gipadayag batok sa proyekto, samtang nagpadayon ang diskusyon kabahin sa posibleng epekto niini sa ekonomiya ug seguridad sa nasud.
