Ipriyoridad sa Kongreso ang pagpasa sa mga nahibiling Legislative-Executive Development Advisory Council (Ledac) measures sa administrasyon ni Pangulong Ferdinand Marcos Jr. atol sa pagbalik sa sesyon karong Lunes, Hulyo 27, 2026.
Sumala kang House Majority Leader Sandro Marcos, 26 pa lang gikan sa 52 ka priority bills ang na-endorso sa konseho, ug target nga mapadayon kini sa ikaduhang legislative year.
Gipasalig usab nga ilang siguruhon nga makatabang ang mga proposed nga balaod sa Presidente, ilabi na sa katawhang Pilipino, aron hinay-hinay nga mapaayo ang ilang kahimtang sa kinabuhi.
Lakip sa mga nahibiling Ledac bills ang gisugyot nga Cybersecurity Act nga anaa na sa calendar sa kapulungan, samtang gihulat pa ang committee report kabahin sa mga sugyot nga nagdili sa mga paryente sa mga opisyal sa gobyerno sa pagkuha og kontrata sa mga proyekto sa gobyerno.
Andam na usab alang sa final approval ang mga amendment sa Cooperative Code ug ang sugyot balaodnon nga magdeklara sa National Thanksgiving Day matag ika-upat sa Nobyembre.
Nagpabilin usab nga pending ang siyam pa ka priority bills sa appropriations committee, lakip ang mga balaod aron mapalambo ang transparency sa paggasto sa gobyerno, samtang ang 15 pa ka mga balaod anaa sa pagdumala sa technical working groups.
